Ձեր փոքրիկը մեծացել է ևս մեկ ամսով: Նա ամրացել և աճել է:
3 ամսականում տղան 5,7-7,2 կգ է կշռում, իսկ հասակը՝ 59,4-63,5 սմ: Միևնույն ցուցանիշները աղջիկների համար՝ 5,2-6,6 կգ քաշը, հասակը՝ 57,7-61,9 սմ:
Երեխան բացահայտում է արտաքին աշխարհը: Նա արդեն ոչ թէ պասիվ հետևորդ է, այլ փորձառու հետազոտող: Այս շրջանում երեխան ցանկանում է ավելի շատ բան իմանալ իրեն շրջապատող իրերի մասին (օր.՝ մատների ծայրով շոյում է փափուկ ծածկոցը ): Իհարկե երեխայի ամենասիրելի ուսումնասիրման օբյեկտը հենց ինքն է:
Փոքրիկը ձեռքով ուսումնասիրում է իր երեսը, բերանը, քիթը, աչքերը, կզակը: Հետաքրքրությամբ ուսումնասիրում է իր ձեռքերը, փորձելով հասկանալ, թե ինչու են շարժվում այդ փոքրիկ մատները: Նա ակտիվ փորձում է հասնել տարբեր իրերի: Իհարկե, սկզբում դա այնքան էլ հեշտ չէ և հաճախ նա վրիպում է, սակայն երեք ամսական երեխան անհավանական համառ է և անպայման հասնում է իր նպատակին:
Նա գիտակցաբար հարվածում է գլխի վերևում կախված խաղալիքներին, եթե արդյունքում տեղի ունենա ինչ-որ հետաքրքիր իրադարձություն: Օրինակ, եթե խաղալիքը ձայներ է հանում կամ հարվածից թռվռում է վերև-ներքև:
Ամենաակտիվ փոքրիկները կարողանում են թեքվել փորից մեջքի վրա և հակառակը, իսկ մյուսները պարզապես թեքվում են կողքի: Եթե բալիկի առջև որևէ իր պահեք, նա կփորձի բռնել այն միաժամանակ երկու ձեռքերով: Շատ բալիկներ կարողանում են իրար միացնել թաթիկներն ու անգամ ծափ տալ:
Այս շրջանում բավական արագ զարգանում է փոքրիկի խոսելու ունակությունը:
Նրա բառապաշարը պարբերաբար ավելանում է:
Այժմ նրա խոսքերից կարելի է ոչ միայն ձայնավորներ առանձնացնել, այլ նաև բաղաձայններ՝ «Լ», «Ն», «Բ», «Պ», «Մ»:
Փոքրիկն ուշադրությամբ հետևում է շարժվող իրերին: Եթե նրա աչքերի առջև չխկ-չխկիկ բերեք և անմիջապես պահեք, ապա երեխան որոշ ժամանակ ուշադիր կնայի այն կողմ, որտեղ վերջին անգամ տեսել է խաղալիքը, կփորձի հիշողության մեջ վերականգնել շարժման հետագիծը՝ կրկին սպասելով նրա վերադարձին:
3 ամսական երեխան չի սպասում, թե երբ են մեծահասկաները սկսելու իր հետ շփվել: Նա պատրաստ է ինքնուրույն կապ հաստատել շրջապատողների հետ: Փոքրիկը նպատակասլաց դեմքեր է փնտրում, ժպտում է և տարբեր ձայներ հանում:
Այս շրջանում երեխան բաց է շփման համար: Նրան հաճելի է շրջապատի ուշադրությունը, նա հաճույքով խոսում է անծանոթների հետ և ուրախանում դրանից: Չնայած որ փոքրկը ժպտում է բոլորին, ամենաուրախ էմոցիաները բաժին են ընկնում հայրիկին և մայրիկին:
Անգամ եթե մայրիկը ոչինչ չի խոսում, փոքրիկը ճանաչում է նրան և հաճելիորեն ժպտում: Փոքրիկին երջանկացնում է մայրիկի հայտնվելու պահը, անկախ նրանից մայրիկը իրեն ուշադրություն կդարձնի, թե ոչ:
Երեք ամսականում երեխան արդեն կարողանում է փոխանցել ձայենրի մի ամբողջ տարափ: Նա կարող է լացել, գոռալ, ծիծաղել, տարբեր ձայներ հանել և ծնողները անպայման կհասկանան, թե կոնկրետ ինչ է ուզում իրենց փոքրիկը:
Փոքրիկը կարող է բավական երկար ժամանակ շփվել մեծերի հետ: Շփման ընթացքում նա օգտագործում է ոչ միայն ձայներ, այլ նաև միմիկա և ժեստեր: Այս տարիքում երեխան արդեն լավ հասկանում և ըմբռնում ծնողների տրամադրությունն ու ձայները: Մայրիկի և հայրիկի լավ տրամադրությունը միանշանակ փոխանցվում է փոքրիկին: