Հինգ ամսականում երեխայի զարգացումը շատ կարևոր է կյանքի հետագա փուլերի համար, նաև շատ կարևոր է այն հանգամանքը, թե արդյո՞ք մայրն ինքն է կերակրում բալիկին (կրծքի կաթ), թե արհեստական կերեր է տալիս: Երեխան ունի անձամբ ձեր կարիքը, բայց անգամ եթե այլընտրանք չունեք բնական տարբերակով կերակրելու համար, ապա ճիշտ ժամանակն է այլ կերակուր առաջարկել երեխային:
Հինգ ամսականում արդեն կարելի է տալ մրգային պյուրեներ և հյութեր՝ հիմնականում խնձորի և տանձի հյութեր: Կարելի է տալ նաև գազարի հյութ փոքր քանակությամբ: Խորհուրդ է տրվում գազարի և կաղամբի պյուրե: Սկզբում պետք է տալ 1 գդալ, որպեսզի երեխան զգա համը: Հնարավոր է, որ փոքրիկին նոր համը այդքան էլ դուր չգա: Այդ դեպքում պետք է ժամանակավոր դադարեցնել տվյալ կերակուրը՝ որոշ ժամանակ անց կրկին փորձելու նպատակով:
Այլընտրանքյաին կերակրատեսակ է համարվում նաև շիլան: Կարելի է բալիկին տալ մաննու շիլա: Այն պետք է եփել շատ ջրիկ, որպեսզի երեխան չխեղդվի: Հետագայում, երբ երեխան սովորի գդալով ուտել, կարելի է տալ նաև ավելի պինդ վիճակում: Շատ օգտակար է եգիպտացորինի ալյուրից պատրաստված շիլան, այն եփվում է նույն մաննիի սկզբունքով:
Հինգ ամսական երեխայի բնականոն զարգացման համար անհրաժեշտ են ամենօրյա զբոսանքներ: Ցանկալի է բարենպաստ եղանակային պայմաններում: Բայց անգամ եթե գալիս է թույլ անձրև, պետք չէ հրաժարվել զբոսանքից: Վերցրեք մանկասայլակը, անձրևանոց և մանկասայլակի ծածկոցը և շտապեք դուրս, քանի որ մաքուր օդը անձրևի ժամանակ և անձրևից հետո բավական օգտակր է փոքրիկի թոքերին: Զբոսանքի դուրս գալուց երեխային շատ հագուստ մի հագցրեք, հակառակ դեպքում երեխան կարող է քրտնել, իսկ հետո մրսել: Պարզապես վերցրեք տագ վերարկու բալիկի համար, եթե կզգաք, որ ձեզ համար ցուրտ է, այդ ժամանակ հագցրեք նաև փոքրիկի վերարկուն: Փոքրիկի հետ զբոսնեք օրվա մեջ առնվազն մեկ ժամ: Անհրաժեշտության դեպքում, եթե դժվարանում եք մանկասայլակն իջեցնել, խնդրեք հարևաններին, որ օգնեն ձեզ: Իսկ ավելի ճիշտ կլինի սովորեցնեք ձեր ամուսնուն տանել ձեզ և բալիկին զբոսնաքի, երբ նա տանն է:
Հինգ ամսական փոքրիկն արդեն ցանկանում է նստել, սակայն պետք չէ նրան նստեցնել, որոշ ժամանակ անց փոքրիկն ինքը կնստի՝ առանց ձեր օգնության: Իսկ եթե շտապեք նստեցնել հինգ ամսականից, ապա կարող եք վնասել փոքրիկի ողնաշարը: Եթե փոքրիկը ինքնուրույն է նստում, մի անհանգստացեք, ուրեմն եկել է ժամանակը: Կարելի է փոքրիկի մոտ բարձեր դնել, որպեսզի նա կարողանա հարմար նստել: Զգույշ եղեք, որպեսզի բալիկը չընկնի մահճակալից կամ բազմոցից: Այս շրջանում երեխաները բավական ակտիվ են և կարող են թեքվել մեջքից փորի վրա և փորից մեջքի վրա: Այնպես, որ եղեք ուշադիր:
Հինգ ամսականում շատ իրեր սկսում են հետաքրքրել փոքրիկին: Կարելի է նրա համար տարբեր ռետինե խաղալիքներ գնել, որպեսզի զարգանան փոքրիկի մատների և ձեռքերի շարժիչ հմտությունները:
Թողեք փոքրիկին հավաքել իր խաղալիքները մահճակալում պարկած: Կարելի է գնել փոքրիկ բուրգ, ժամանակի ընթացքում նա կսկսի այն հավաքել ճիշտ հերթականությամբ:
Քանի որ փոքրիկը ամեն ինչ կարող է տանել բերանը, խաղալուց առաջ խաղալիքները 15 րոպե եռացրեք ջրում: Այս տարիքում արդեն կարող եք երեխայի համար փոքրիկ հեքիաթներ կարդալ, ցուցադրել վառ գունավոր նկարներ: Նա անպայման կհիշի ձեր բառերը և կսկսի ինքնուրույն խոսել, թեկուզ և իր բառերով և ձայներով, բայց և այնպես այս ամենը նպաստում է բալիկի զարգացմանը: