Ութ ամսական երեխաները շատ էներգիա են ծախսում ֆիզիկական ծանրաբեռնվածության վրա և սկում են ավելի դանդաղ աճել: Տղաների քաշը կազմում է 7,7-9,6 կգ, հասակը՝ 68,4-72,8 սմ, աղջիկների մոտ համապատասխանաբար ՝ 7,1-9,1 կգ և 66,4-71,1 սմ:
Այս շրջանում փոքրիկների մեծ մասը արագ են սովորում բարձրանալ աստիճանները, ինչը ծնողների համար գլխացավանք է առաջացնում: Եթե տանը աստիճաններ կան, երեխան մեծ հաճույքով է բարձրանում մինչև վերջ և կանչում է մայրիկին, քանի որ ներքև իջնելը բալիկների համար ավելի դժվար է և կարող է վախի զգացում առաջացնել:
Լցվեք համբերությամբ՝ շուտով փոքրիկը կսովորի ինքնուրույն իջնել աստիճաններով:
Իսկ առայժմ, պարզապես փոքրիկ, արհեստական խոչընդոտ ստեղծեք, որպեսզի բալիկը աստիճաններին չմոտենա:
Ութ ամսական երեխան արդեն լավ կարողանում է օգտագործել ցուցամատը, հեշտորեն վերցնում է տարբեր ոչ մեծ իրեր և սննդի կտորներ: Փոքրիկին գրավում են այն խաղալիքները, որոնք կարելի է դնել մեկը մյուսի մեջ: Նրան առավել շատ են դուր գալիս արկղերը, որտեղ կարելի է իրեր դնել: Այս շրջանում երեխայի ամենասիրած զբաղմունքներից մեկը տարբեր տարաներ դատարկելն է՝ կլինի այնտեղ որևէ հեղուկ, կոճակներ, խաղալիքներ, շան կեր, թե հող ու ավազ: Մայրիկի գործը բարդանում է, քանի որ մի կողմից փոքրիկը պետք է ուսումնասիրի շրջապատը, իսկ մյուս կողմից պետք է զգուշանալ, որ բալիկը ոչ մի ավելորդ իր բերանը չտանի և կուլ չտա:
Բալիկի հիշողությունը ևս զարգանում է: Նա արդեն կորղանում է հիշել վերջին իրադարձությունները, խաղալիքների անունները, որոնք օգտագործում է ամեն օր: Դա թույլ է տալիս նրան հեշտ կողմնորոշվել սենյակում, ինչպես նաև հասկանալ բառերի (իրերի) փոխկապվածությունը: Փոքրիկն արդեն հասկանում է, որ իրերը գոյություն ունեն անգամ եթե դրանք չես տեսնում: Եթե փոքրիկի առջև սավանի տակ խաղալիք պահեք, շուտով նա կհասկանա, որ խաղալիքը կարելի է փնտրել և կգտնի այն սավանի տակից:
Փոքրիկն արդեն հասկանում է, որ ծնողները նույնպես կարող են իր տեսադաշտից կորչել, իսկ հետո նորից հայտնվել: Չնայած փոքրիկների զարգացման փուլերը համընկնում են, ամեն դեպքում յուրաքանչյուր երեխա անցնում է այդ փուլերը յուրովի: Որոշ երեխաների մոտ մատներն ու ձեռքերն ավելի շուտ են զարգանում և նրանք սկսում են խաղալ խաղալիքներով և փոքրիկ իրերով, իսկ որոշ երեխաներ սկզբից սովորում են վստահ նստել և սողալ: Կան երեխաներ ում մոտ խոսքն ավելի շուտ է զարգանում, քան քայլելու գոծընթացը:
Այս շրջանում փոքրիկը ծնողներից փորձում է փախչել և տան սենյակներն ուսումնասիրել: Չէ՞ որ հայրիկը և մայրիկը տանն են և հետվերադարձի ճանապարհը փոքրիկը հիշում է անգիր: Իսկ նոր մարդկանց և տեղանքներին փոքրիկը դեռևս զգուշորեն է վերաբերվում:
Բալիկի ճկունությունն ու անվախությունը կախված է նրա ինքնագիտակցությունից՝ նա կարող է զգուշանալ անծանոթներից, սակայն եռման ջրով կաթսան նրան կարող է չվախեցնել և վտանգավոր չթվալ: Եթե փոքրիկը վախենում է նա հպվում է մայրիկին, ով ցանկացած պարագայում նրա պահապան հրեշտակն է:
Ութ ամսական փոքրիկը կարող է արտասանել մայրենի լեզվի գրեթե բոլոր ձայները:
Դեռևս չհասկանալով բառերի իմաստը՝ փոքրիկը արձագանքում է տարբեր տոնայնությունների, որոնք արտահայտում են մեծահասակները և լավ է հասկանում զրուցակցի տրամադրությունը: Բալիկները հաճույքով հետևում են մեծահասակներին և փորձում են կրկնօրինակել նրանց: Նրա շարժումները դեռևս վերջնական ձևավորված չեն և նա այդքան էլ լավ չի կարողանում ձեռքում պահել իրերը: Օգնեք ձեր փոքրիկին և ձեր զբաղմունքը նրա համար վերածեք խաղի, օրինակ՝ հեռախոսով խոսալու ընթացքը: Խաղացեք նրա հետ իր խաղալիք հեռախոսով՝ սկզբից զանգահարեք նրան, այնուհետև առաջարկեք, որ ինքը խոսի հեռախոսով: Այնքան ժամանակ փոխանցեք լսափողը միմյանց, որ այդ խաղը հետաքրքրի երեխային: Թույլ տվեք նրան նաև ինքնուրույն բռնել սանրը և ճիշտ դիրքով սանրել մազերը: Անպայման գովեք երիտասարդ «վարսավիրին» փորձերի համար: