Ավարտվում է փոքրիկի կյանքի առաջին տարին: Դուք լավ եք հիշում, թե ինչ տեսք ուներ ձեր փոքրիկ հրաշքը մեկ տարի առաջ և որքան է մեծացել նա: Այս ընթացքում փոքրիկի հասակը աճել է 25 սմ-ով, իսկ քաշն ավելացել է 7 կգ-ով: Փոքրիկն ունի արդեն 6-8 ատամ և իշխում է իր շրջակա միջավայրում: Սա արդեն մեծ ձեռքբերում է:
Փոքրիկների զարգացումը շարունակվում է: Նրանք ակտիվ շարժվում են՝ օգտագործելով ծնկներն ու թաթիկները: Առավել ակտիվ և աշխույժ փոքրիկները արդեն քայլում են ինքնուրույն՝ մեծահասակի ձեռքը բռնած կամ էլ կահույքից բռնվելով: Փոքրիկը վերահսկում է իր զարգացման ընթացքը: Նա փորձում է մեկ ձեռքով պահպանել հավասարակշռությունը, իսկ մյուսով բռնել որևէ իր կամ խաղալիք: Գետնին նստած փոքրիկը այլևս հավասարակշռությունը չի կորցնում, անգամ եթե դուք այդ ընթացքում բարձրացնեք նրա ոտքերը հերթականությամբ:
Ձեռքի շարժումները ևս ավելի կոորդինացված են: Փորձելով վերցնել մի քանի իր՝ փոքրիկը ձեռքը բացում է տարբեր խաղալիքների համար տարբեր մեծությամբ: Փոքրիկը արդեն կարողանում է զուգահեռաբար օգտագործել երկու ձեռքերը: Նա սկսում է իրերը բռնել բութ մատի և ցուցամատի օգնությամբ: Փոքրիկն ավելի ինքուրույն է դարձել: Նա փորձում է ինքնուրույն ուտել, խմել, օգտագործել գդալը և այլն:
Երեխան դրսևորում է տարածական զարգացում: Նա հաճույքով արկղից հանում է խաղալիքները, սակայն նույնությամբ հետ դնելու գործընթացը այդքան էլ լավ չի ստացվում: Դեռևս դժվար է հասկանում, թե ինչպես է մի խաղալիքը մտնում մյուսի մեջ, դա ակընհայտ է, երբ տալիս եք փոքրիկին իրար մեջ մտնող մի քանի խաղալիք: Աշխույժ փոքրիկը անընդհատ փորձում է փոքր խաղալիքը մեծի մեջ դնել և, անկախ արդյուքնից, անընդհատ համառորեն կրկնում է այն:
Սովորելով քայլել՝ փոքրիկը զուգահեռաբար իրականացնում է այլ գործողություններ՝ քաշ է տալիս իր հետևից խաղալիքը կամ հրում է այն: Այն փոքրիկներն, ովքեր մեկ տարեկանից շուտ են սովորել քայլել, զարգացնում են իրենց կարողությունները՝ կքանստում են, պարկում են առանց մեծերի օգնության, գլորում են գնդակը և հետևում նրա ընթացքին:
Նարնք արդեն հասկանում են, որ իրենց աչքի առջև պահած խաղալիքը չի կորել և իրենք կարող են այն գտնել: Թաքցրեք խաղալիքը արկղի տակ և նա կհանի ու կտա այն ձեզ:
Այս տարիքում փոքրիկին կարելի է սովորեցնել տարբեր խաղեր՝ քաշել մեքենան դեպի իրեն, պարկեցնել արջուկին քնելու և այլն: Երեխան շարունակում է ուսումնասիրել անծանոթ ամեն ինչ՝ քաշելով, գցելով, թափահարելով, տանելով դեպի բերանը և կծելով: Սակայն ամեն ինչ չէ, որ երեխային դուր է գալիս այս ընթացքում: Նա կարող է տարբեր երևույթներից անհարմարություն զգալ, ինչի մասին անմիջապես զգացնել է տալիս նաև ձեզ: Նոր զգացողությունները երեխային պետք է սովորեցնել աստիճանաբար: Փորձեք հպվել փոքրիկի մարմնին, մեջքին և թաթիկներին փափուկ խաղալիքների միջոցով, ինչը նրան դուր կգա:
Փոքրիկը ակտիվ շփվում է ծանոթ հարազատ մարդկանց հետ, սիրով հայտնվում է նրանց ուշադրության կենտրոնում: Նա ավելի ու ավելի է ձգտում դեպի բազմազանությունը: Նրա խաղերը դառնում են առավել ընդգծված, և ցանկալի է կոնկրետ ժամանակ հատկացնել փոքրիկի հետ խաղալու համար: Առավել կարևոր է, որ բալիկի հետ շատ խաղա հայրիկը: Մայրիկի և հայրիկի խաղերը տարբերվում են: Հայրիկը փոքրիկի հետ աղմկոտ խաղեր է խաղում՝ թռցնում է բալիկին օդ, խաղում մեքենաներով, վազում է նրա հետ
գնդակի հետևից և այլն:
Շատ փոքրիկներ մեծ սիրով ուսումնասիրում են նկարներով գրքերը, ինչը սակայն նրանց չի խանգարում գիրքն օգտագործել այլ նպատակներով՝ հարվածել գետնին, պտտեցնել այն, քշել և այլն: Երեխայի համար առաջին գրքերը պետք է լինեն փոքր և հասկանալի, ցանկալի է գրավիչ՝ մեծ նկարներով: Գնեք հիմնականում առանց տեքստերի գրքեր, թողեք փոքրիկը խաղա դրանցով: Կարդացեք կենդանիների և առարկաների անունները բարձրաձայն:
Փոքրիկն անընդհատ ձգտում է շփվել ծնողների հետ և փնտրում է նորանոր ուղիներ: Նա ընտրում է հատուկ ձայներ և ժեստեր, որպեսզի հնարավորինս հեշտ բացատրի հայրիկին և մայրիկին այն, ինչը ինքը ցանկանում է:
Մեկ տարեկանում երեխան արդեն գիտի բավական շատ ձայներ և ձայնային գամմաներ՝ «մա-մա», «պա-պա», «բա-բա»): Դրանք որոշ երեխաների մոտ դառնում են առաջին բառերը: Այս շրջանում շատ բալիկներ կարող են ասել իրենց առաջին լիարժեք բառը: Երբ բալիկը հստակ բառ է ասում, դուք այն ակընհայտորեն տարբերում եք ձայներից, քանի որ այն անմիջականորեն կապված է մարդկանց կամ առարկաների հետ: Իսկ ձայնային կապակցությունները արտասանվում են հենց այնպես օդի մեջ: Դուք կարող եք զգալ, թե առանց խոսելու երեխան որքան բան է հասկանում և ցույց տալիս: Հայրիկի կամ մայրիկի խնդրանքով նա թաթիկով է անում, ծափահարում է, դադարում է կատարել որոշ գործողություններ, արձագանքում է ծնողների արգելքներին: Բառերի քանակը, որը նա հասկանում է, անհամեմատ գերազանցում են այն բառերի քանակին, որոնք փոքրիկն արտասանում է: Նա հասկանում և իրականացնում է հասարակ խնդրանքները՝ «տուր ինձ», «ցույց տուր ինձ», «հանիր գնդակը» և այլն: Փոքրիկը ցույց է տալիս իրեն, երբ իր մասին են խոսում և նայում է ծնողների կողմը, երբ նրանցից են խոսում: Նա սկսում է հասկանալ «ոչ» բառը, բայց ոչ միշտ է արձագանքում արգելքներին, օրինակ՝ որոշ ժամանակ չի անում այն, ինչ ծնոնղներին դուր չի գալիս, սակայն քիչ անց կրկին շարունակում է անել իրեն հաճելի գործողությունը:
Այս տարքիում երեխային օգտակար են հետևյալ խաղալիքները՝ բույն-խաղալիքներ (իրար մեջ մտնող), բուրգեր և իրար միացվող դետալներով խաղալիքներ, խորանարդներ, անցքերով խաղալիքներ, գործարանային խաղալիքներ (մեքենաներ, բադիկներ), տիկնիկներ, ռետինե խաղալիքներ, մանկական ամաններ, երաժշտական խաղալիքներ և այլն: