Երգում էր գիշերը մուկը բնի մեջ.

- Քնիր մկնիկ ու լռիր,

Կտամ ես քեզ համով հաց,

Խոր քուն մտիր ու քնիր:

Պատասխանեց փոքրիկը.

- Քո ձայնը շա՛տ է բարակ,

Լավ է մայրիկ չերգե՛ս,

Ու ինձ նոր դայակ բերե՛ս:

 

 

 

 

Վազեց մկնիկ-մայրիկը,

Կանչեց արագ բադիկին.

- Արի՜ մեզ մոտ բադ քույրիկ,

Անուշ քուն փոքրիկին տուր:

Եկավ բադիկն ու երգեց.

- Քնի՜ր մկնիկ, գա-գա-գա,

Անձրևը, որ էլ չգա,

Այգուց ճիճու կբերեմ:

Փոքրիկ հիմար մկնիկը,

Կիսաքնած մրթմրթաց.

- Ո՛չ, քո ձայնը լավը չէ՛:

Այս ի՞նչ բարձր ես դու երգում:

Վազեց մկնիկ-մայրիկը,

Կանչեց արագ գորտիկին.

- Արի՜ շուտ, գորտ մորաքույր,

Անուշ քուն փոքրիկին տուր:

Սկսեց գորտը լուրջ երգել.

- Կվա՜-կվա՜-կվա՜, պետք չէ լացել:

Քնի՛ր մկնիկ, մինջև լույս,

Կտամ քեզ համով մժեղ:

Փոքրիկ հիմար մկնիկը,

Կիսաքնած մրթմրթաց.

- Ո՛չ,  քո ձայնը լավը չէ՛:

Շատ տխուր ես դու երգում:

Վազեց մկնիկ-մայրիկը,

Կանչեց ձիուն, որ օգնի.

- Ձի մորաքույր դու արի՜,

Անուշ քուն փոքրիկին տուր:

- Ի-հո՜-հո՜,- երգում էր ձին,

Քնի՛ր մկնիկ, անուշ-անուշ,

Թեքվիր աջ կողքի վրա,

Կտամ քեզ մի պարկ խոտ:

Փոքրիկ հիմար մկնիկը,

Կիսաքնած մրթմրթաց.

- Ո՛չ, քո ձայնը լավը չէ՛,

Վախենում եմ, մի՛ երգի:

Վազեց մկնիկ-մայրիկը,

Կանչեց արագ խոզուկին.

Արի՜, արի՜ խոզ քույրիկ,

Անուշ քուն փոքրիկին տուր:

Սկսեց խոզը խռխռացնել,

Եվ փոքրիկին քնացնել.

- Բայո՜ւ-բայո՜ւ, խրյո՜ւ-խրյո՜ւ-խրյո՜ւ:

Հանգստացիր ու քնիր:

Փոքրիկ հիմար մկնիկը,

Կիսաքնած մրթմրթաց.

-  Ո՛չ, քո ձայնը լավը չէ՛,

Շատ կոպիտ ես դու երգում:

Մտածեց մայր մկնիկը,

Պետք է կանչել հավիկին:

- Արի՜ հավիկ մորաքույր,

Անուշ քուն փոքրիկին տուր:

Կչկչում էր հավիկը.

- Կուդ-կուդա՜,  մի վախիր փոքրիկ մկնիկ,

Մտիր արագ թևիս տակ,

Եվ հանգիստ է և շատ տաք:

Փոքրիկ հիմար մկնիկը,

Կիսաքնած մրթմրթաց.

-  Ո՛չ, քո ձայնը լավը չէ՛,

Այսպես քնել չի՛ լինի:

Վազեց մկնիկ-մայրիկը,

Կանչեց գայլաձկանը.

- Արի՜ մեզ մոտ գայլաձուկ,

Անուշ քուն փոքրիկին տուր:

Սկսեց երգել գայլաձուկը,

Բայց մկնիկը չլսեց:

Բացում-փակում էր բերանը,

Կրկին ոչինչ չլսվեց:

Փոքրիկ հիմար մկնիկը,

Կիսաքնած մրթմրթաց.

-  Ո՛չ, քո ձայնը լավը չէ՛,

Շատ ցածր ես դու երգում:

Վազեց մկնիկ-մայրիկը,

Կանչեց փամփլիկ փիսիկին:

- Արի՜ փիսիկ մորաքույր,

Անուշ քուն փոքրիկին տուր:

Սկսեց փիսիկը երգել.

- Մյաո՜ւ-մյաո՜ւ, քնիր փոքրիկ:

Մյաո՜ւ-մյաո՜ւ, շուտ պարկենք,

Մյաո՜ւ-մյաո՜ւ, որ քնենք:

Փոքրիկ հիմար մկնիկը,

Կիսաքնած մրթմրթաց.

- Քո ձայնն այնքան անո՜ւշ է,

Շատ քա՜ղցր ես դու երգում...

Վազեց մկնիկ-մայրիկը,

Արագ նայեց անկողնուն,

Փնտրեց հիմար մկնիկին,

Իսկ մկնիկը էլ չկար...

 

Սամուիլ Մարշակ